26-28/4 台北三天自由行

是次台北之旅一行九人，我地選擇左住西門町之”長虹大飯店”。到達之後先發覺此乃一間大堂連一張梳化都無的”大飯店”。不過房間設備尚算OK。

放底行李就急不及代跑上街搵食，第一餐我地選擇左食”鴨肉扁”，不過原來此舖並不是食鴨，而係食鵝。緊接住”鴨肉扁”，我地又去食左鹽酥雞，同埋飲果汁。填飽個肚之後、我地就撘捷運去左101大樓同新開的誠品書店。到左夜晚，會合埋兩個台灣朋友之後，佢地帶左我地去一間叫”五十嵐” 之舖頭飲珍珠奶茶；唔飲由至可，一飲之後就對佢念念不忘；一個字---‘滑’。珍珠奶茶還未飲完之際，我地又已經到左”太和殿”食麻辣火鍋，第一次食正宗台灣麻辣火鍋感覺係---‘好麻’；唔係好食到食物的味道，但係我又幾鍾意呢個‘麻’ 味。食完火鍋我地去左行”士林夜市”，於夜市我地十一條友竟然走左去夾公仔。行完夜市之後就去左”錢櫃KTV”唱卡拉OK，超抵玩；又飲又食唱左四個鐘埋單都係港幣六百蚊。返到飯店已經係零晨三點幾。

第二日一早先食個豆槳栥飯早餐，跟住就撘捷運去北投浸溫泉，由於要帶浴帽浸的關係，老總為左要‘型’於是將頂浴帽改左好多造型；超好笑! 下晝我地去左淡水的老街，於老街食左超多野，分別有花枝丸、切仔粉、魯肉飯、燒腸、燒魷魚、臭豆腐、鹽酥菇、冰糖葫蘆、燒酒螺、黑豆腐花等…想起都想食！食完、行完我地仲走左去做20分鐘腳底按摩…爽！黃昏的時候台灣朋友放工出來會合我地，之後再帶我地去左漁人碼頭，景超靚；感覺好浪漫；此刻多想有個男朋友在旁！夜晚台灣朋友車左我地去基隆食海鮮，沿途再食左個話係全台灣最出名的鹽酥雞、鹽酥魷魚同甜不辣，聽說F4仔仔好鍾意食這檔的鹽酥雞，不過真係好好食！晚飯後我地又再去”錢櫃KTV”唱卡拉OK…終於又零晨四點先有得sleep。

第三日，訓左四個鐘又要起身，先台灣朋友再去左中正紀念堂行左轉，之後就趕去買手信，都係離不開鳳梨酥、鴨舌等…。午餐去左”鼎泰豐”食，我飲左個燉雞湯…一個字---‘正’！ 其他例如小籠包就真係好一般。午餐後再食多個甜品‘粉圓’ 就返飯店check out了！

總括呢三日的行程，都係離不開食、玩、笑，真係好開心。好彩有台灣朋友帶我地周圍玩，另到我地全程都好充實、好順暢！